Saturday, June 25, 2016

සිංහලේ අවසන් රජදහන.....The Last Kingdom Of Sinhaley.
















ඔබ එල්මෝ ජයවර්ධනව අසා තිබේද? මම සිතන ලෙස ඔහු අප්‍රසිද්ධ ලේඛකයෙකි. මම මුලින්ම ඔහුව හඳුනා ගත්තේ 'සැමීගේ කතාව' ( Sam's Story) කෘතියෙනි.ඉංග්‍රීසියෙන් ලියන ලාංකික ලේඛකයන් අතර ඔහු සුවිශේෂී අයෙකකු ලෙස මම දකිමි.මයිකල් ඔන්ඩච්චි වැනි එවන් කතුවරුන් මෙන් නොව එල්මෝ ජයවර්ධන තෝරා ගන්නේ පොදු ජනතාවට අති සමීප මාතෘකාවන්ය.'සැමීගේ කතාව' එයට කදිම නිදසුනකි. ඒ කෘතිය ඇසුරින් නිමවූ ජගත් චමිල ජාත්‍යන්තර සම්මාන ලබාගත් සිනමා පටයෙන් පසුව වුවද කතුවරයා ගැන මහජන අවධානය ප්‍රමාණවත් ලෙස යොමු නොවූයේ යැයි සිතමි. 'සැමීගේ කතාව' මට මතක ලෙස මා කියැවූයේ හයේ පන්තියේදීය.දෙන්න අදිමදි කරමින් එය මට දුන් බට්ටි (ඩිලාන්) ට තුති!

මෙම කතුවරයාගේ දෙවැනි පොත , නො එසේ නම් මේ ලිපියේ නිමිත්ත - සිංහලේ අවසන් රජදහන- මම කියැවූයේ මතුගම Rebuilding Foundation Library යට පින්සිදු වන්නටය.මතුගම අවට බොහෝ පාඨකයන්ගේ කියැවීමේ පිපාසාව සංසිඳුවන්නේ එය මිස කෙහෙල්මල් මහජන පුස්තකාලය නොවේ. රාජ්‍ය නොවන සංවිධානයකින් මෙහෙයවූවද එහි මෙහෙය අමිල ය. එයට පිං!

මම මතුගමින් මඳක් දුර බැහැර සිටින්නෙක්මි.එහෙයින් මම කැමති දවස් ගණනක් කියැවිය හැකි 'තඩි' පොත් වලටය.මාව මේ පොතට මුලින්ම ආකර්ෂණය කලේ එහි අන්තර්ගතය නොව විශාලත්වයයි. මතක හැටියට එය පිටු අටසීයකට කිට්ටුය. මම සිතුවේ එය දවස් ගණනක් කියවන්නටය. මම මගේ ජීවිතයේදී පරිහරණය කල විශිෂ්ටතම පොතක් මට හමුවූයේ එලෙසය. ඉතිං ... මම කියැවූයෙමි... කියැවූයෙමි...දිගින් දිගටම...එක හුස්මටම ....

ඒ පොතට මම කෙතරම් ලොබ බැන්දාදැයි කියතොත් එය මා පමණක් කියවා මදි බව හැඟුණි. එහෙයින් මට එය ඔබ සමග බෙදා ගැනීමට සිතුණි....මට මුළු පොතම අකුරින් අකුර විස්තර කිරීමේ අදහසක් නැත.මා විඳි චමත්කාරය විඳීමට අවැසි නම් ඔබටද මෙය කියවීමට ම සිදුවේ..

Thursday, June 16, 2016

මම්මලේ මට ඇහෙනවා බං ඉකිබිඳින හඬ මේනකා..

           දීකිරි කෑවගේ සරදියෙල්.දීකිරි කෑවගේ අදාසි අප්පුගේ සහ ශ්‍රී වික්‍රම රාජසිංහගේ රාජකීය රුධිරයෙන් පැවත ආ පිචෝ හාමිගේ පළමු පුත්‍ර රත්නය. ඉංග්‍රීසි ආණ්ඩුවෙන් "අති භයානක" යන නම්බු නාමය හිමිකරගත් අතලොස්ස අතරට අයත් වූ එක් සිංහලයෙක්.සොරෙක්.මං පහරන්නෙක්.මිනීමරුවෙක්.ස්ත්‍රී ලෝලයෙක්. නමුත් නිර්භය හදවතක හිමිකරුවෙක්.
           මොනරවිල නිලමේ තුමාට , පුරන් අප්පුට සහ ගොන්ගාලේගොඩ බන්ඩා ට පසු ආයුධ සන්නද්ධව ඉංග්‍රීසි ආණ්ඩුවට එරෙහි වූ එකම සිංහලයා.ලංකාවේ පළමු පොලිස් භට ඝාතනයට වරදකරුවා.
           ආයුධ සන්නද්ධවම ඉංග්‍රීසින්ට එරෙහිව සටන් කරමින් සිටියදී අවසන් වරට අත් අඩංගුවට පත් වෙනවා. එවිට ළඟ ඉන්නා එකම මිතුරා,සහායකයා, මම්මලේ මරික්කාර්. මරක්කලයා.
            සරදියෙල්ගේ ක්‍රියා අදටත් ප්‍රශ්නගතයි. ඔහු විමුක්ති අරගලකරුවෙක්ද? හුදු මංකොල්ලකරුවෙක්ද? උත්තර නෑ. නමුත් අටසිය දහඅට සහ අටසිය හතලිස් අට පරාජයන්ගෙන් ලැජ්ජාවට පත්ව හිටි සිංහලයන් තුල අරගලයේ පළමු ගිනි පුපුර දල්වන්නේ ඔහු....
            අටසිය හැට හතරේ සරදියෙල් මිය යන විට ... ඒ වසරේම උපදිනවා දොන් ඩේවිඩ් හේවාවිතාරණ. පසුකාලීනව අනගාරික ධර්මපාල. ජාතියේ ප්‍රාණ වායුව....
සරදියෙල්ගේ සහ මම්මලේගේ විවාහක නැගණිය මේනකා ගේ අසම්මත ප්‍රේමය පසුකාලීනව නන්නාඳුනනා තරුණයෙක් අකුරු වලට හරවනවා...රුවන්. රුවන් බන්දුජීව.
          ඔබට කොහොම වෙයිද දන්නෙ නෑ. මට නං බොක්කටම වැදුනා. මේක තියෙන්නෙ රුවන්ගෙ "මීළඟ මීවිත" පොතේ.  මෙන්න ඒක...

                                   තුංග උතුවන් කන්ද පාමුල
                                   කෝපිමල් අහුරක් තියා
                                   මම්මලේ මට ඇහෙනවා බං
                                   ඉකිබිඳින හඬ මේනකා....

                                   බංගලාවක් බින්ද දවසක
                                   හංගගෙන ආ රිදී කූරක්
                                   කෝපිමල් අහුරක්ම ගැවසූ
                                   කෙස් රොදක් අතුරින් යවා
                                   හිඟුල ඔය ළඟ වාඩිකර උඹ
                                   හැඩ බලන්නට ආයෙ දවසක්
                                   එන්නෙ නෑ මට මේනකා
                                 
                                   මම්මලේ මට ඇහෙනවා බං

                                   ඉකිබිඳින හඬ මේනකා....

.....
                               
                               
               

Wednesday, June 15, 2016

පළමුවෙනි පෝස්ටුව..



             කියන්න නං ලොකු දෙයක්  නෑ. තාමත්  බ්ලොග් වල  හතර මායිම් හොයන ගමන්...පුළුවන් ඉක්මනට ලොකුම ලොකු දෙයක් කරන්නං....